Odatda chempionlik jangi uchun UFC TOP jangchilari 8 haftalik tayyorgarlik lagerini o‘tashadi. Bunda birinchi oy juda intensiv jismoniy yuklamalar va sparinglardan iborat bo‘lsa, ohirgi haftalar vazn yo‘qotish va bevosita raqibga moslashish jarayoniga bag‘ishlanadi. Bir kunlik kempdan chekinish ham formaga yoki vaznga ta’sir qilishi mumkin. Lekin shunday atletlar borki, kimningdir o‘rniga, qisqa muddatli ogohlantirishdan so‘ng oktagonga chiqishga rozi bo‘ladilar.

UFCning maxsus eng ashaddiy «bezorilar» uchun joriy etgan BMF kamari egasi Xorxe Masvidal ana shu toifaga kiradi. U doim tayyor. Tasavvur qiling, Kamaru Usman ushbu vaznning mutloq chempioni va Masvidalga u bilan urishasanmi deb 1 hafta qolganda aytishmoqda. Qanaqa tayyorgarlik bu yerda? Birinchi kuni Mayamidan Vegasga yetib borishga ketdi. Yana bir kuni tibbiy test. Keyin Vegasdan Abu Dabiga uzoq parvoz bo‘ladi. Borib ozgina dam olsa kerak. Shundan so‘ng rasmiy vazn o‘lchash marosimi va boshqa jarayonlar. Mashg‘ulot qilishga umuman ulgurmaydi. BAA havosiyu vaqt tafovutiga moslashishni aytmasayam bo‘ladi.

Ammo eng xavfli raqibga qarshi mana shu jangni qabul qildi. Shuning uchun ham muxlislar Masvidalni hurmat qilishadi. U o‘ziga ishonadi va kim bilandir har qanday vaziyatda urishishga tayyorman dedimi, bajaradi. Bizni esa tarixda birinchi bor janglar orolida o‘tadigan katta shou kutyapti. Byorns o‘rniga Masvidal Usmanga qarshi chiqishi UFC-251ni yil voqealaridan biriga aylantirdi.

Davron Fayziyev.