9-турдан кейин "Пахтакор"нинг жамоавий турли жиҳатлар бўйича Суперлигада кўрсаткичларини тақдим этамиз.

Жамоамиз энг кўп тўп киритган - 24та. Бунга энг яқин клублар "Қўқон-1912"да 17, "Металлург"да эса 15 гол мавжуд. Энг кўп вазият яратиш борасида "Пахтакор" қолган клублардан анчагина устун. Ўтган 9 учрашувда жами 85 марта гол уриш учун вазиятлар юзага келтирилган (бир ўйинда ўртача 9тадан). Бу борада кейинги натижа "Насаф"га тегишли бўлиб, бу жамоада 48та имконият бўлган. Дарвоза томон "Пахтакор" 81 бор аниқ зарба йўллаган.
Бу борада ҳам иккинчи кўрсаткич "Насаф"га тегишли бўлиб, қаршиликлар рақиб дарвозасига 44 марта зарба беришган.

"Пахтакор" бир ўйинда ўртача 665тадан аниқ узатмани амалга оширмоқда ва бунда аниқлик кўрсаткичи 88 фоизни ташкил қилади. "Бунёдкор" эса 527 узатма ва 86 фоизлик натижа билан кейинги поғонада бормоқда. Футболчиларимиз бир ўйинда ўртача 11 мартадан вазиятларни кескинлаштирадиган ҳал қилувчи узатмани ижро этишмоқда. "Локомотив" ва "Насаф"да бу миқдор 8тага тенг.

Ҳозиргача энг кўп бурчак зарбалари "Пахтакор" тепган - 72та. "Сўғдиёна" биздан кейинги кўрсаткич эгаси бўлиб, жиззахликлар 44 марта бурчак зарбаси ижро қилган. Футболчиларимиз 140 марта рақибларни алдаб ўтишган. 66 фоиз ҳолатларда бу уринишлар самараси чиқмоқда.