ПСЖ Франция Лига Кубоги финалида «Лион»ни таслим этди (0:0, пенальтилар серияси — 6:5).
Шу тариқа парижликлар клуби 2019/20 йилги мавсум Франциядаги барча совринларни ютиб олди. ПСЖ бундан аввал Франция чемпионатида ғолиб чиққан, шунингдек, мамлакат Кубоги ва Суперкубогида зафар қучганди.
Бунақаси сўнгги олти мавсум ичида тўртинчи бор содир бўлди.
ПСЖ 2018/19 йилги мавсумда Франция чемпионлиги ва Суперкубогини қўлга киритган, Кубок финалида «Ренн»га имкониятни бой берган ва Лига Кубогида ¼ финалда қолиб кетганди. 2016/17 йилги мавсумда эса Лига 1 мусобақа жадвалида «Монако»ни олдинга қўйиб юбориб, чемпионликни бой берганди.
