Европа чемпионлар лигасида сўнгги ярим финалчининг номи аниқ бўлди. Франциянинг "Лион" клуби чорак финалда сенсацион тарзда «Манчестер Сити»ни мағлуб этиб, кейинги босқичга йўл олди.

Францияликлар учрашувнинг 24-дақиқасида уюштирилган ҳужумдан ўта самарали фойдаланишди. Олдинга чизиққа етказилган узатмани Токо-Экамби эгаллади, аммо марказий ҳимоячи Эрик Гарсия "подкат" орқали тўпни қайтарди. Ўша жойда пайдо бўлган Корне дарҳол зарба бериб, дарвозани ишғол қилди.

"Лион" гол уриб олганидан кейин ҳимояда мустаҳкам ҳаракат қила бошлади. "Шаҳарликлар"нинг уринишлари 69-дақиқада ўз самарасини берди. Стерлинг чап томондан жарима майдонига кирди ва бир ҳимоячини алдаб ўтиб, ортдан келаётган Де Брюйнега узатма берди. Кевин эса аниқ зарба билан ҳисобни тенглаштирди.

Ҳисоб тенглашгач, францияликлар фаолликни оширишди ва яна олдинга ўта бошлашди. Захирадан майдонга тушган Мусса Дембеле ўйин сўнгида 2та гол уришга муваффақ бўлишди. "Сити" футболчилари майдон марказида тўпни йўқотишди ва қарши ҳужум ташкил қилишди. 79-дақиқада Мусса дарвозабон билан яккама-якка вазиятга чиқди ва дарвозани ишғол қилди.

Учрашувнинг 85-дақиқада Раҳим Стерлинг ўзига думалаб келган тўпни атиги 4 метрдан бўш қолган дарвозага жойлай олмади — тўп юқорига кўтарилиб кетди. "Сен урмасанг — сенга уришади" қоидаси ишга тушди ҳамда 87-дақиқада Дембеле ўзининг иккинчи голини урди. Ауар йўллаган зарба натижасида Эдерсон тўпни қўлидан чиқариб юборди. Мусса эса тўпга биринчи бўлиб етиб келди, ҳамда дарвозани ишғол қилди — 1:3!

Шу тариқа, "Лион" ҳеч кутмаганда ярим финалга йўл олди. Жамоа финал йўлланмаси учун "Бавария"га қарши майдонга чиқади.

Европа чемпионлар лигаси, чорак финал
Манчестер Сити Англия – Лион Франция 1:3 (0:1, 1:2)
Голлар: 0:1 – 24 Корне, 1:1 – 69 де Брюйне, 1:2 – 79 Дембеле, 1:3 – 87 Дембеле.
Манчестер Сити – Эдерсон, Жоау Канселу, Уокер, Лапорт, Эрик Гарсия, Фернандиньо (Марез, 56), Родри Эрнандес (Сильва, 84), де Брюйне, Гюндоган, Стерлинг, Габриэл Жезус.
Лион – Антони Лопеш, Марсело, Марсал, Денайер, Дюбуа (Тете, 74), Какре, Бруно Гимараэс (Тиаго Мендес, 70), Ауар, Корне, Токо-Экамби (Рен-Аделаид, 87), Депай (Дембеле, 75).
Огоҳлантиришлар: Дюбуа (12), Фернандиньо (29), Родри Эрнандес (58), Марсело (64).