Европа чемпионлар лигасининг дастлабки финалчиси аниқ бўлди. Чорак финалда "Атлетико" қаршилигини чиройли синдира олган «Лейпциг», бу сафар «Пари Сен-Жермен» олдида ожизлик қилди. Юлиан Нагельсманнинг режаси бугун иш бермади. Аксинча, "ПСЖ" юлдузларининг ўйини тўқнашув тақдирини ҳал қилди.

Учрашувнинг 6-дақиқасида Мбаппенинг узатмасидан кейин Неймар яккама-якка вазиятга чиқди. Бразилиялик футболчининг зарбасидан кейин тўп устунга тегиб, майдонни тарк этди.

Орадан 7 дақиқа ўтиб учрашувда ҳисоб очилди. Ди Мария жаримадан етказилган узатмани Маркиньос бош билан дарвозага буриб юборди.

Баҳснинг 35-дақиқасида Неймар яна бир зарба билан устунни нишонга олди. Бўлим тугашига 3 дақиқа қолган "Лейпциг" дарвозабони Петер Гулачи қўпол хатога йўл қўйди. Парадес тўпни жарима майдонига етказди ва Неймар товони билан шундай узатма бердики, Ди Марияда дарвозани ишғол қилишдан бошқа имконият қолмади — 0:2.

Иккинчи бўлимнинг 56-дақақасида эса ҳисоб йирик кўринишга келди. Ди Мариянинг чап қанотдан етказган тўпини Хуан Бернат дарвозага жойлаб қўйди.

Германияликлар қолган дақиқаларда ҳужумкор ўйин намойиш этишга ҳаракат қилишди. Аммо "ПСЖ" қарши ҳужумлари хавфлироқ чиқди.

Шу тариқа, "Пари Сен-Жермен" ўз тарихида илк марта Европа чемпионлар лигаси мусобақаси финалига чиқди.

Европа чемпионлар лигаси, ярим финал
РБ Лейпциг Германия – ПСЖ Франция 0:3 (0:2)
Голлар: 0:1 – 13 Маркиньос, 0:2 – 42 Ди Мария, 0:3 – 56 Бернат.
РБ Лейпциг – Гулачи, Анхелиньо, Упамекано, Мукиеле, Клостерманн (Орбан, 82), Лаймер (Хальстенберг, 62), Забитцер, Кампль (Адамс, 64), Ольмо (Шик, 46), Нкунку (Форсберг, 46), Поульсен.
ПСЖ – Рико, Бернат, Кимпембе, Тиаго Силва, Маркиньос, Паредес (Дракслер, 83), Эррера (Верратти, 83), Ди Мария (Сарабия, 87), Керер, Мбаппе (Шупо-Мотинг, 86), Неймар.
Огоҳлантиришлар: Кимпембе (45), Лаймер (61), Хальстенберг (79), Поульсен (79).