Ла лига президенти Хавьер Тебас «Барселона» ҳужумчиси Лионель Месси билан юз берган воқеа ҳақида ўз фикрини билдириб ўтди.
Эслатиб ўтамиз, аргентиналик футболчи жамоани эркин агент сифатида тарк этмоқчи бўлган бўлса, "кўк-анорранглилар" 700 миллион евро миқдоридаги товон пули амалда эканига таяниб, Леони қўйиб юбормади.
«Мен Месси билан жанг қилмадим. Мен Испания чемпионатининг ҳар қандай футболчисига нисбатан шундай йўл тутган бўлардим. Қонунийлик ва адолатни ҳимоя қилиш — Лига сифатида бизнинг бурчимиз. Сенинг исминг Мессими ёки Пепито Перес — шартномаларни ҳурмат қилишинг керак.
Шахсан мен Месси ва унинг атрофидагилар билан жанг қилинмади, деб ҳисоблайман. Леога нисбатан меҳрим ўзгача, уни яхши кўраман. У футболимизнинг сўнгги 20 йилдаги тарихи. Ахир у билан жанг қилиб бўладими? Таъкидлайман: мен шунчаки шартномаларга амал қилинишини истадим. Месси иши матбуотда шов-шувга айланиб кетди.
Унинг ҳуқуқшунослари аксини айтишаётган бўлса-да, унинг шартномаси шаффоф тузилган. Шартномадаги банднинг нотўғри талқин қилиниши хатоликка олиб келди. Якунда эса Месси ҳуқуқий зиддиятларга бормасдан ўз жамоасида ўйнашда давом этишга қарор қилгани қувонч бағишлайди», — деди Тебас.