Мадриднинг «Реал» клуби ярим ҳимоячиси Мартин Эдегор жамоасининг бир нечта ўйинларини ўтказиб юбориши мумкинлиги ҳақида AS нашри хабар тарқатмоқда.
Футболчи жамоанинг душанба кунги машғулотларида оёғида оғриқ сезган. Яқин соатлар ичида 21 ёшли футболчи яна тиббий-кўрикдан ўтади ва жароҳатининг қанчалик жиддийлиги ҳақида маълумот тарқатилади.
«Қаймоқранглилар» Эдегорнинг жароҳати жиддий эмаслигига умид қилишмоқда. Норвегиялик футболчи «Реал»нинг 9 декабрь куни ЕЧЛ доирасида бўладиган «Боруссия» (М) ва 12 декабрь куни Мадриднинг «Атлетико» клубларига қарши ўйинда майдонга тушмайди.
