"Барселона"нинг собиқ ҳужумчиси Кристиан Тельо профессионал футболдаги фаолиятини якунлаганини эълон қилди. Испаниялик футболчи 35 ёшида бутсаларини михга илишга қарор қилди.

Тельо профессионал фаолияти давомида жами 512 та учрашувда майдонга тушди. "Барселона" тарбияланувчиси каталонияликларнинг асосий жамоасида 86 та ўйин ўтказиб, 20 та гол ва 14 та голли узатма қайд этган. Кейинчалик у "Порту", "Фиорентина" ва "Бетис" каби клубларда ҳам тўп тепди. "Бетис" сафида эса 172 учрашувда 24 та гол урди ва 20 та ассист амалга оширди.

Испаниялик вингер фаолиятининг сўнгги йилларида "Лос-Анжелес", Саудия Арабистонининг "Ал-Фатҳ" ва "Ал-Оруба" ҳамда БААнинг "Палм Сити" клубларида ҳаракат қилди.

"Бугун ҳаётимнинг бир қисми билан хайрлашяпман. Футбол менга ҳамма нарсани берди. У бир пайтлар имконсиздек туюлган орзуларимни амалга ошириш, умрбод ёдимда қоладиган инсонлар билан танишиш ва унутилмас лаҳзаларни бошдан кечириш имконини берди", — дея Тельонинг хайрлашув сўзларидан иқтибос келтирилган.

Тельо "Барселона" билан икки марта Ла Лига ва Испания кубогини қўлга киритган, шунингдек, Чемпионлар лигаси ғолиби бўлган. У Испания миллий терма жамоаси сафида ҳам бир марта майдонга тушган.