Ҳозирги кунда Европанинг кўпгина топ-клублари каби «Реал» ҳам иқтисодий жиҳатдан мураккаб вазиятни бошидан кечирмоқда. Агар жамоа Европа чемпионлар лигаси плей-офф босқичига чиқа олмаса, клуб янада қийин аҳволга тушиб қолади.

«Сантьяго Бернабеу» стадиони март ойидан буён ёпилган, унга мухлислар кирмаяпти. Ўйингоҳ келаси йилнинг июнь ойига қадар ёпиқ бўлади. Клубга қарашли "Adidas" дўконида савдолар ҳажми камайган.

Телетрансляциялар ҳуқуқидан тушадиган даромад ҳам 15-20%га пасайди. Шу боис, Менхенгладбахнинг «Боруссия» клубига қарши ўйин «Мадрид» учун ўта муҳим аҳамиятга эга эканини барча тушуниб турибди. "Қаймоқранглилар" ЕЧЛда плей-оффга чиқа олишмаса, жамоанинг жорий мавсумдаги даромади яна 20-25 фоизга камайиб кетади.

Жамоа 2018 йилда Чемпионлар лигасида ғолиб чиқиш орқали Европа суперкубоги, клублар ўртасидаги ЖЧ каби мусобақалар ёрдамида қўшимча 12 миллион евро ишлаб олган эди.

Шунинг учун Флорентино Перес ўйинчилардан маошларнинг пасайтирилишига рози бўлишларини сўрамоқчи. Футболчилар ўтган мавсумда маошларнинг 10%га камайтирилишига рози бўлиб, Испания суперкубоги ва Ла лигадаги ғолиблик учун мўлжалланган бонуслардан воз кечишганди.

Чемпионлар лигаси 1993 йилда қайта ташкил этилган пайтдан бошлаб «Реал Мадрид» бирор марта ҳам гуруҳ босқичидан чиқиб кетмаган эди. Клуб ҳамиша плей-офф босқичига чиққан, ҳаттоки Европа лигасида ҳам ўйнамаган.