Франциянинг "ПСЖ" клуби январда "Тоттенхем" ярим ҳимоячиси Деле Аллини ижарага олмоқчи.
Алли "Тоттенхем" сафида биринчи марта Премер-лиганинг 1-турда "Эвертон"га қарши ўйинда асосий таркибда майдонга тушганди ва ўша ўйиндан заҳирага олинганидан кейин норозилик билдирганди.
Ўшандан бери Алли АПЛда атиги 21 дақиқа ўйнади - октябрда "Манчестер Юнайтед"га қарши учрашувда Моуриньо унга 21 дақиқа ўйнаш имкониятини берганди.
Daily Mail тарқатган хабарга кўра, Алли ўзининг жамоа тутаётган ўринидан норози ва у доимий равишда майдонга тушадиган клубга кетишга тайёр. Чунки, Алли Англия терма жамоаси билан Европа Чемпионатида қатнашмоқчи.
"ПСЖ" Алли атрофидаги вазиятни диққат билан кузатмоқда, у ўтган ёзда Делега қизиқиш билдирган эди, аммо кейинчалик "Тоттенхем" парижликларнинг футболчини ижарага олишга бўлган барча уринишларига тўсқинлик қилганди.
"ПСЖ" бу сафар "шпорлар" Аллининг қўйиб юборилишига рози бўлишларини ҳис қилишмоқда. 24 ёшли инглизни ижарага бериш таклифи яқин ҳафталарда келиши кутилмоқда.
