Аргентиналик футбол афсонаси Диего Марадонанинг жасади қабрдан кавлаб олиниб, мовзелейга жойлаштирилиши мумкин.

Марадона ўлимидан бир неча кун аввал адвокати Мария Бодрига васият қолдирган бўлиб, унда Диего вафотидан сўнг жасадини мўмиёлаб, мовзелейга жойлаштиришни сўраган. "The Sun" тарқатган хабарга кўра, Марадона Владимир Ленинга ҳурмат бажо келтириш мақсадида шундай қилиниши мақсад қилган.

«Чуқур ўйлаб кўрганимдан кейин шундай қарорга келдимки, вафотимдан кейин менинг жасадим мўмиёланиб мовзелейга жойлаштирилсин. Атрофимга эса совринларим, шахсий буюмларим қўйилсин. Инсонлар эса бу жойдан муҳаббат олишда давом этишини истайман», — дея ёзилган васиятда.

Адвокат Мария Бодри мазкур васият борасида ўз фикрини билдирди.

«Маълум бир жойда мовзелей ташкил қилиниши режалаштирилмоқда. Буни Марадона ўз ака-укалари билан муҳокама қилган. Бу борада бизда жиддий, аниқ таклиф бор. Лекин бунга Аргентина футбол федерацияси масъул ҳисобланади», — деди адвокат.

Эслатиб ўтамиз, Диего Марадона 25 ноябрь куни вафот этган эди.