"Ливерпуль" бош мураббийи Юрген Клопп Англия чемпионатининг 16-тури доирасида бўлиб ўтган "Ньюкасл"га қарши ўйин (0:0) борасида ўз фикрини билдириб ўтди.

"АПЛда фақат яхши жамоалар ўйнайди. Бизда гол уриш учун ажойиб имкониятлар бўлди. Рақиб кучли. Очко йўқотилган ўйинда жамоани мақташ керак эмас, деб ўйлаш мумкин, аммо бугунги ўйин менга ёқди. Бундан яхшироқ ўйнашимиз мумкинми? Ҳа, лекин бу ўйинда ғалаба учун керагидан ортиқ ишни қилдик.

Назаримда, 4та юз фоизли имкониятга эга бўлдик. Бундан аввал "Ньюкасл"ни камроқ вазият яратган ҳолда мағлуб этган пайтларимиз бўлган. Бугун омадимиз келмади. Натижани қабул қилишдан бошқа иложимиз йўқ. Бугунги баҳсдан қониқиш ҳосил қилдим.

Ўйинчиларнинг ҳафсаласи пир бўлди, бу нормал ҳолат, лекин гап уларнинг ўйинида эмас. Ушбу пойдевор билан кейинги ҳафтада, кейинги ойда нимадир қурамиз. Ажойиб ўйин, аммо натижа биз кутгандек эмас", - деди Клопп.