Каталониянинг «Барселона» клуби сардори Лионель Месси Values Award 2020 совринини қўлга киритди.
Аргентиналик футболчи Каталониядаги Сант Жоан де Деу касалхонасида дунёдаги энг катта болалар онкологик маркази қурилишига хайрия қилгани учун ушбу совринга лойиқ деб топилди.
«Барселона»нинг собиқ ярим ҳимоячиси Хави ҳам «фаолияти давомида адолатли ўйинларни тарғиб қилгани учун» ушбу мукофотни қўлга киритди.
Values Award Испаниянинг Diario Sport нашри томонидан ташкил қилинган. Ҳакамлар ҳайъати таркибига Испания олимпия қўмитаси президенти Алехандро Бланко ва Ла Лига президенти Хавьер Тебаслар киради.
