Хабарингиз бор, "Барселона" сардори Лионель Месси жорий мавсум сўнгида эркин агентга айланади. Миш-мишлар эса аргентиналик футболчининг тақдирини "Пари Сен-Жермен" билан боғламоқда.
Леонинг "Барса"даги тақдирига 24 январь куни бўлиб ўтадиган президентлик сайловидан сўнг ойдинлик киритилади. Янги раҳбар футболчи билан музокара олиб боради.
"Marca" нашри франциялик журналист Жюльен Лоранга таяниб хабар тарқатишича, Мессига маош тўлаш учун парижликларнинг пули етмаслиги мумкин.
"Молиявий fair-play, COVID-19 пандемияси — ушбу омилларнинг барча айни пайтда клубларга босим ўтказмоқда. Ушбу глобал муаммодан "ПСЖ" ҳам четда қолмаяпти. Месси билан шартнома борасида эса: Неймарнинг йиллик маоши 30 миллион еврога тенг, Лионель эса 60 миллион евро пул сўрайди. Бундан ташқари, Мбаппе билан янги шартнома имзолаш масаласи турибди. Клуб унга ҳам 30 миллион евро маош таклиф қилди.
Фақатгина мана шу уч футболчининг маоши, мукофотлар ва солиқларни қўшиб ҳисоблаганда клуб харажати 150 млн еврога етади. Ҳозирда эса буни таъминлашнинг имкони йўқ!
Шунга қарамай, "ПСЖ" таваккал қилиши мумкин. Аммо бунинг эҳтимоли юқори эмас", — дея ёзди журналист.