Мадриднинг «Реал» клуби бош мураббийи Зинедин Зидан Испания Кубоги 1/16 финал босқичи доирасида «Алькояно» (1:2) жамоасига қарши бўлиб ўтган учрашув ҳақидаги фикрлари билан ўртоқлашди.

«Ғалаба қозониш учун ҳаракат қилдик, футболчилар майдонда бор кучларини беришди. Гол киритиш учун имкониятларга эга бўлдик. Аммо, омадимиз келмади. Бу қийин вазият, Испания Кубогини тарк этдик, лекин футболчилар ҳаракат қилишди.

Жавобгарликни ўз бўйнимг оламан. Футболчилар ғалабага ҳаракат қилишди ва агар иккинчи голни киритганимизда ҳаммаси бошқача бўларди. Бироқ, бу футбол. Уларнинг дарвозабони 2-3 та ажойиб сэйвларни амалга оширди. Лекин, қайтариб айтаман, жавобгарликни бўйнимга оламан.

Бундай лигадаги жамоани мағлубиятга учратишимиз шарт эди. Аммо, содир бўлган воқеа шармандалик эмас, бундай ҳодисалар бўлиб туради – бу айнан биз билан юзага келди. Ишлашда давом этамиз, бу мағлубиятдан кейин ақлдан озмаймиз.

Сўнгги ўйинларни ҳисобга олмаганда, яхши натижалар қайд этдик. Энди бор эътиборимизни яқинлашиб келаётган ўйинларга қаратишимиз керак.

Мен хотиржамман. Футболчилар ғалаба қозонишни хоҳлашмоқда, лекин гоҳида ўхшамай қоляпти. Буни тўғри қабул қилиш керак», – деди Зидан.