Ҳужумчи Хулиан Альварес келажаги борасида бир қарорга келди. Marca нашри хабарига кўра, аргентиналик футболчи «Атлетико» билан янги шартнома имзоламоқчи эмас, ваҳоланки бу келишув уни жамоанинг энг кўп маош олувчи ўйинчисига айлантириши мумкин эди.

Альвареснинг мақсади — «Барселона»га ўтиш. Футболчини «Атлетико»да асосий юлдуз бўлиб қолишдан кўра, «кўк-анорранглилар» сафида Ламин Ямаль, Рафинья ва бошқаларга шерик бўлиш фикри кўпроқ ўзига жалб қилмоқда. Хулиан «Атлетико» таклиф қилаётган лойиҳадан кўра амбициялироқ лойиҳага қўшилишни истайди. Альварес «Барселона» билан совринлар ютиш имконияти юқорироқ деб ҳисобламоқда.

Шунга қарамай, Альвареснинг «Атлетико»дан «Барселона»га эҳтимолий трансфери осон кечмайди. Мадрид клуби ҳужумчи учун камида 150 миллион евро талаб қилади. «Матрасчилар» каталонияликларнинг бундай суммани тўлашга қурби етишига ишонишмаяпти. Айнан шу омил «Атлетико»га 26 ёшли форвардни жамоада сақлаб қолиш имконини бериши мумкин.