Украинанинг "Sport.ua" интернет-нашри тарқатган хабарга кўра, Киевнинг "Динамо" ва Қаршининг "Насаф" клубларида иш олиб борган Анатолий Демяненко "Волинь" билан шахсий шартнома бандларини келишиб олган ва ҳафта охирида луцкликлар бош мураббийи сифатида таништирилади.
Нашр хабарига кўра, "Волинь" икки ҳафта давомида Демяненко билан музокаралар олиб борган, аммо барчаси мураббийнинг ўзига боғлиқ бўлиб турган эди. "52 ёшли мутахассиснинг ҳозирги жамоаси - "Насаф" украиналиклардан товон пули талаб қилаётган эди, афтидан, томонлар бу масалада келишувга эришишган", дейилади "Sport.ua" хабарида.
Украиналик мураббийнинг "Чемпионат.ком" интернет-нашрига берган интервьюсида "Волинь" билан ҳақиқатан ҳам музокаралар олиб бораётганини тан олган.
"Ҳақиқатан ҳам Волинь" билан музокаралар олиб борилмоқда. Аммо мени бу жамоанинг бош мураббийи деб айтишга ҳали эрта", деди Демяненко.
"5 январда ҳаммаси ойдинлашмайди. Барчаси, кўп эҳтимолки, 8 январга бориб ойдинлашади. "Насаф" билан боғлиқ расмиятчиликлар ҳали ҳал қилингани йўқ", деди Анатолий Демяненко "Чемпионат.ком"га берган интервьюсида.
Эслатиб ўтамиз, 4 январь куни "Насаф" расмий сайти Демяненконинг "Волинь" бош мураббийи этиб тайинланиши ҳақидаги хабарларни миш-мишдан бошқа нарса эмаслигини ёзиб чиққанди.
