Янги мавсумга тайёргарликни Тошкент шаҳрига кўчирган Отабек Ғуломхўжаев бошчилигидаги "Андижон" жамоаси ўз футболчилари билан шартномани узайтиришда давом этмоқда.

Клуб раҳбарияти аввалроқ иқтидорли ҳужумкор ярим ҳимоячи Фарҳод Соҳибжонов билан шартномани узайтирганлиги ҳақида хабар бериб ўтгандик.

"Бургутлар" раҳбарияти яна бир истеъдодли ярим ҳимоячи Муҳаммадкарим Тоиров билан амалдаги шартномани узайтирди.

"Андижон" жамоаси тарбияланувчиси саналган Тоиров шу кунгача ёшлар жамоасида ўйнаб келган ва ўтган мавсумнинг охирги учрашувларида асосий таркибда майдонга тушган.

Унинг "Андижон" жамоаси билан амалдаги шартномаси 2021 йилнинг 1 декабригача амал қиларди. Янги шартнома қанча муддатга тузилганлиги ҳақида клуб матбуот хизмати маълумот тарқатмаган.