Саудия Арабистонининг "Ан-Насср" клубига ўтиши кутилаётган Жалолиддин Машарипов фаолиятини Бирлашган Араб Амирликларида давом эттирадиган бўлди. Бу ҳақда kooora.com'га асосланиб хабар тарқатди Stadion.uz нашри.
Чунки ар-риёдликларга янги футболчини рўйхатдан ўтказиш учун тегишли рухсатни ололмади. "Насср" жароҳат олиб мавсум охирига қадар сафдан чиққан жанубий кореялик Ким Жин Сунинг ўрнига Машариповни қўшиб олишга ҳаракат қилди. Аммо Саудия Арабистони Спорт вазирлиги ар-риёдликларга бунга ижозат бермади.
"Раҳбарият Ким Жин Сунинг ўрнига Жалолиддин Машариповни рўйхатдан ўтказиш учун жиддий ҳаракат қилди. Бунинг учун барча ҳужжатлар тақдим этилди. Аммо янги ўйинчиларни рўйхатдан ўтказиш учун рухсатни қўлга кирита олмадик.
Машарипов бўйича Араб мамлакатлари ва Форс кўрфази клубларидан кўп таклифлар олдик. Жамоани инқироздан олиб чиқиб кетиш учун ечим топишга ҳаракат қилдик.
Биз БААнинг "Шабаб ал-Аҳли" клуби билан келишувга эришдик. Машарипов мавсум охирига қадар ижара асосида Амирлик клубида ўйнайди", — деди "Ан-Насср"даги манба.
Эслатиб ўтамиз, "Шабаб ал-Аҳли" ўзбекистонлик ярим ҳимоячи Азизжон Ғаниев фаолият олиб боради. Дубайликлар жорий мавсумда 13та ўйиндан кейин 19 очко билан жадвалда 7-поғонани эгаллаб туришибди.
