«Атлетико» ярим ҳимоячиси Янник Карраско ва ҳимоячиси Марио Эрмосо коронавирусга топширган тест мусбат натижа берди. Ҳар икки футболчи ўз уйларида карантинга олинди. Бу ҳақда мадридликлар расмий сайти хабар тарқатди.
27 ёшли Карраско жорий мавсумда «Атлетико» сафида 19та ўйинда майдонга тушиб, 3та гол урди ва 5та голга узатма берди.
25 ёшли Эрмосо ҳисобида эса 20та ўйинда 2 гол ва 1та ассист мавжуд.
«Атлетико» Ла лиганинг 18та ўйинидан кейин 47 очко билан жадвалда яққол пешқадамлик қилмоқда. Жамоа 31 январь куни «Кадис»га қарши майдонга тушади.