Ўзбекистон миллий жамоаси бош мураббийи Вадим Абрамов ўзбекистонлик ярим ҳимоячи Жасур Жалолиддинов ва Москванинг «Локомотив» клуби ўртасидаги шартноманинг бекор қилиниши борасида ўз фикрини билдириб ўтди.

«Жалолиддиновнинг «Локомотив»даги фаолияти мураббийга боғлиқ эди. Назаримда, мураббий Жасурнинг клубга ёрдам бериши мумкинлигига ишонмади. Ушбу трансферда спорт мақсадларидан ташқари яна қандайдир мақсадлар кўзланганмиди ёки йўқми, бирор нарса дейиш қийин. У билан 4 йиллик шартнома имзоланди, унинг келажаги порлоқ. У бежизга жаҳоннинг энг иқтидорли 60 нафар футболчиларига рўйхатига киритилмади.

Шубҳасиз, Жалолиддинов «Локо» даражасидаги ўйинчи. Бундай клуб билан шартнома имзолаган ҳар қандай футболчининг боши айланиб, юлдузлик касалига чалиниши мумкин. Аммо Жасур — камтар йигит. У ҳеч нарса ичмайди, чекмайди. Унга ўзини кўрсатиш учун шунчаки имконият беришмади. Ана, Азарнинг «Челси»дан «Реал»га ўтишини ғалати трансфер, деб аташ мумкин.

«Локомотив» раҳбарияти адашдими ёки йўқми, буни вақт кўрсатади. Ўйлашимча, Жасур жамоага наф келтирган бўларди. Ҳозир "Локо"да раҳбарият ўзгарди. Райковичнинг трансферини эса ғалатироқ, деб айтиш мумкин», — деди Абрамов.