Кеча ЎФФ Терма жамоалар марказида Мураббий кенгашининг 2012 йилдаги илк йиғилиши бўлиб ўтди. Бу ҳақда ЎФФ расмий твиттери хабар бермоқда.
Мураббийлар кенгашининг янги йилдаги биринчи мажлисига ЎФФ Терма жамоалар маркази директори Асқар Толибжонов раҳбарлик қилган. У брошюра кўринишида чоп этилган, барча терма жамоаларнинг 2012 йилдаги мусобақаларга тайёргарлик дастури билан танишиб чиққан ва терма жамоалар мураббийларига топширган.
Йиғилиш давомида терма жамоалар бош мураббийлари билан шартномалар имзоланган. Футбол бўйича аёллар терма жамоасининг собиқ аъзоси Ольга Ким 19 ёшгача бўлган қизлар терма жамоасига бош мураббий этиб тайинланган.
"Ўзбекистондаги жаҳон чемпионати учун тузилган U-20 қизлар терма жамоаси, аксарият футболчилар 19 ёш бўлганлиги учун U-19 термасига айлантирилди. Жамоанинг собиқ бош мураббийи Ислом Аҳмедов ЎФФ Терма жамоалар марказида селекция ишлари бўйича бош мутахассис сифатида меҳнат қиладиган бўлди", дейилади ЎФФ расмий твиттерида.
