“Навбаҳор” ПФК раҳбарияти, жумладан, клуб вице-президенти Отабек Арифович Саматовнинг ташаббуси билан иқтидорли ва ёш футболчиларга эътибор қаратиш мақсадида, ҳар ҳафта “Навбаҳор”нинг маслаҳатчи-мураббийи, шунингдек, фарм, U-21 ёшлар ҳамда U-18 жамоалари мураббийлари ўртасида йиғилиш ўтказиш йўлга қўйилди.     

Бугун “Навбаҳор” жамоаси уй учрашувларини ўтказадиган “Марказий” ўйингоҳда навбатдаги йиғилиш ўтказилди.

Унда клуб вице-президенти Отабек Саматов, “Навбаҳор”нинг маслаҳатчи-мураббийи, тажрибали мутахассис Виктор Жалилов, “Навбаҳор–фарм” жамоаси бош мураббийи Рашид Ғофуров, “Навбаҳор – U-21” ёшлар жамоаси мураббийлари – Усмон Асқаралиев ва Алишер Маҳмудов, “Навбаҳор – U-18” жамоаси мураббийи Аъзам Ражаббаев иштирок этишди.  

Йиғилиш давомида клуб вице-президенти Отабек Саматов “Навбаҳор”нинг барча тоифадаги мураббийлари вилоятимиздаги иқтидорли ҳамда маҳоратли футболчиларга кўпроқ эътибор қаратишлари, бу борада баҳамжиҳатликда, ўзаро бирликда, фикр алмашган ҳолда иш олиб боришлари лозимлигини таъкидлади.

Мураббийлар ҳам Отабек Арифовичнинг фикрларига қўшилган ҳолда, Наманган иқтидорли футболчиларга бой вилоят эканлиги, уларнинг иқтидорларини тўғри йўналтириш лозимлиги, “Навбаҳор” жамоаларидаги айрим  футболчилар Ўзбекистон терма жамоаларига номзод эканликлари, уларнинг маҳоратларидан оқилона фойдаланиш кераклиги борасида ўз мулоҳазаларини билдиришди.

Жумладан, бу борада Виктор Жалилов ҳам ўз фикрини билдириб, иқтидорли ва ёш футболчиларни ўз ёшлари бўйича саралаб олиш кераклиги, улар асосий жамоа таркибидан жой олиш учун “Навбаҳор”нинг U-18, U-21 ёшлар ҳамда фарм жамоаларида ўйнаган ҳолда, яъни босқичма–босқич ўз маҳоратларини оширишлари лозимлигини таъкидлаб ўтди.

Шунингдек, Усмон Асқаралиев ҳам иқтидорли ва ёш футболчиларга кўпроқ эътибор қаратиш лозимлиги, уларни “Навбаҳор”нинг фарм, U-18, U-21 ёшлар жамоаларига кўпроқ жалб этиш борасида ўз фикрини билдирди.   

“Навбаҳор” ПФК матбуот хизмати.