“Navbahor” PFK rahbariyati, jumladan, klub vise-prezidenti Otabek Arifovich Samatovning tashabbusi bilan iqtidorli va yosh futbolchilarga e’tibor qaratish maqsadida, har hafta “Navbahor”ning maslahatchi-murabbiyi, shuningdek, farm, U-21 yoshlar hamda U-18 jamoalari murabbiylari o‘rtasida yig‘ilish o‘tkazish yo‘lga qo‘yildi.     

Bugun “Navbahor” jamoasi uy uchrashuvlarini o‘tkazadigan “Markaziy” o‘yingohda navbatdagi yig‘ilish o‘tkazildi.

Unda klub vise-prezidenti Otabek Samatov, “Navbahor”ning maslahatchi-murabbiyi, tajribali mutaxassis Viktor Jalilov, “Navbahor–farm” jamoasi bosh murabbiyi Rashid G‘ofurov, “Navbahor – U-21” yoshlar jamoasi murabbiylari – Usmon Asqaraliyev va Alisher Mahmudov, “Navbahor – U-18” jamoasi murabbiyi A’zam Rajabbayev ishtirok etishdi.  

Yig‘ilish davomida klub vise-prezidenti Otabek Samatov “Navbahor”ning barcha toifadagi murabbiylari viloyatimizdagi iqtidorli hamda mahoratli futbolchilarga ko‘proq e’tibor qaratishlari, bu borada bahamjihatlikda, o‘zaro birlikda, fikr almashgan holda ish olib borishlari lozimligini ta’kidladi.

Murabbiylar ham Otabek Arifovichning fikrlariga qo‘shilgan holda, Namangan iqtidorli futbolchilarga boy viloyat ekanligi, ularning iqtidorlarini to‘g‘ri yo‘naltirish lozimligi, “Navbahor” jamoalaridagi ayrim  futbolchilar O‘zbekiston terma jamoalariga nomzod ekanliklari, ularning mahoratlaridan oqilona foydalanish kerakligi borasida o‘z mulohazalarini bildirishdi.

Jumladan, bu borada Viktor Jalilov ham o‘z fikrini bildirib, iqtidorli va yosh futbolchilarni o‘z yoshlari bo‘yicha saralab olish kerakligi, ular asosiy jamoa tarkibidan joy olish uchun “Navbahor”ning U-18, U-21 yoshlar hamda farm jamoalarida o‘ynagan holda, ya’ni bosqichma–bosqich o‘z mahoratlarini oshirishlari lozimligini ta’kidlab o‘tdi.

Shuningdek, Usmon Asqaraliyev ham iqtidorli va yosh futbolchilarga ko‘proq e’tibor qaratish lozimligi, ularni “Navbahor”ning farm, U-18, U-21 yoshlar jamoalariga ko‘proq jalb etish borasida o‘z fikrini bildirdi.   

“Navbahor” PFK matbuot xizmati.