Барселонанинг "Эспаньол" клуби бош мураббийи Маурисио Почеттино "Барселона"га қарши ўйиндан кейин ўз фикрлари билан ўртоқлашаркан, ўз жамоасини табриклашни хоҳлашини айтиб ўтди. Бу ҳақда Испаниянинг "AS" нашри хабар бермоқда.
"Эспаньол" ва "Барселона" ўртасидаги Каталония дербиси 1:1 ҳисобидаги дуранг натижа билан якунига етди. Учрашувнинг 16-дақиқасида Фабрегас ҳисобни очган бўлса, 86-дақиқада Васкес ҳисобни тенглаштириб, "Эспаньол"ни мағлубиятдан қутқариб қолди.
"Бугунги катта ўйинимиз билан мен жамоамиз ўйинчилари ва мураббийлар штабини табриклашни хоҳлардим. Жамоа бугун матонат кўрсата олди. Биз қандай қийинчиликларга дуч келишимизни билардик ва довдираб қолганимиз йўқ", деди "Эспаньол" устози.
"Бу бизнинг фалсафамиз, бизнинг ишимиздир. Кўпчилик бизнинг иш услубимизга шубҳа билан қараганди, аммо бугунги ўйин, унда қайд этилган натижа биз тўғри йўлдан кетаётганимизни кўрсатиб берди", деди Почеттино.
"Ўйин сўнггида бизнинг дарвозабонимизга нима қилди? Кристиан Альварес мушагида оғриқ сезди. Унинг жароҳати қанчалик жиддий эканлигини энди биламиз", дея қўшимча қилди "Эспаньол" бош мураббийи Маурисио Почеттино.
"Эспаньол" Испания чемпионатидаги 17 тур учрашувларидан cўнг 24 очко тўплагани ҳолда мусобақа жадвалида 8-ўринда бормоқда. Жамоа 18-турда "Севилья" меҳмони бўлади.
