"Рома" сардори Франческо Тотти жамоадоши Де Россининг жамоада қолиш-қолмаслиги бўйича ўз фикрларини билдириб ўтди. Бу ҳақда Goal.com интернет-нашри хабар бермоқда.
"Рома"нинг етакчи ярим ҳимоячиларидан бири ҳисобланган Даниеле Де Россининг клуб билан амалдаги шартномаси 2012 йилнинг ёзида якунига етиши керак. Клуб футболчига янги, йилига 6 миллион евро маошни назарда тутган шартномани таклиф қилган. Де Росси бу борада ҳозирча сўнгги қарорни қабул қилгани йўқ. Агар у таклифга рад жавобини берадиган бўлса, қишки трансфер ойнасидаёқ сотиб юборилади.
"Менинг маълумотларимга кўра, Даниеле "Рома"да қолмоқчи. У бу жамоанинг катта ишқибози, аммо сўнгги қарорни унинг ўзи қабул қилади", деди "Рома" сардори.
"Луис Энрике билан ҳамманинг муносабати яхши, бутун жамоа уни қўллаб-қувватламоқда. Аввалги йиллар билан қиёслаганда, натижаларни ҳисобга олмасак, ҳаммаси ўша-ўша. Биз айнан натижаларни яхшилаш устида иш бораяпмиз", дея қўшимча қилди "Рома" ҳужумчиси Франческо Тотти.
