Махачқалъанинг "Анжи" клуби ярим ҳимоячиси Балаш Жуджак яқин кунлар ичида Москванинг "Динамо" клуби билан шартнома имзолайдиган бўлди. Бу хақда футболчининг агенти Йожеф Воршбараньи матбуотга маълум қилди. Москваликлар чап оёқда яхши ўйин намойиш эта оладиган қанот вингерига муҳтожлик сезаётгандилар. "Анжи"нинг венгриялик ярим ҳимочиси бундай рол учун айни муддао бўлган футболчи эди. Жароҳат олгач "Анжи" сафида камдан-кам ўйинга тушаётган футболчи, қишда янги жамоага кўчиб ўтишга тайёрланаётган эди. Унга Россия премьер-лигасининг бошқа бир жамоаси, Москванинг "Динамо"сидан жиддий ва жуда қулай таклиф тушган. "Динамо" клуби президенти Махачқалъа клуби вакилларига Балаш Жуджак борасида қулай таклиф билан чиққан. Томонлар футболчи борасида ўзаро келишувга эришган, дея хабар бермоқда "sport-express" нашри. Жуджак душанба куни Москва шахрига етиб келган. Маълумотларга қараганда, икки кун ичида футболчи расман "Динамо" футболчисига айланади. Футболчининг трансфер суммаси борасида аниқ маълумотлар ҳозирча йўқ.

Эсингизда бўлса, Венгрия терма жамоаси аъзоси ҳисобланган Балаж Жуджак ўтган йили "ПСВ"дан "Анжи" сафига 15 миллион евро эвазига келиб қўшилганди.