"Пахтакор" машғулотларига 5 январь куни қўшилган Ли Си Ин (Lee Si In) жамоани тарк этган. Айни вақтда жамоада япониялик Ноая Сибамура билан биргаликда, жанубий кореялик Ли Донг Вон (Lee Dong Won) ҳам синовдан ўтмоқда. Бу ҳақда "Пахтакор" расмий сайти хабар бермоқда.

Ли Си Ин мураббийлар штаби ишончини қозона олмаган. Ноая Сибамура эса ҳали ҳам кўрикдан ўтмоқда. У "Гўзтепа"га қарши учрашувда асосий таркибда майдонга ҳам тушди. Шунингдек, Жанубий Кореянинг "Чуннам Дрэгонз", "Инчхон Юнайтед", "Дечон Ситизен", "Пусан И-Парк", "Ульсан Хёнде" клубларида тўп сурган 28 ёшли ҳимоячи Ли Донг Вон ҳам синовдан ўтмоқда.

"Юқорида номлари келтирилган легионерларнинг ҳар иккиси ҳам ҳимоячи экнлигини ҳамда биттагина осиёлик ўйинчини таркибга жалб этиш мумкинлигини инобатга оладиган бўлсак, мураббийлар ишончини оқлаган тақдирларидагина улардан бири билан шартнома имзоланади. Бу номга ким сазовор бўлиши эса легионерларнинг ўзига боғлиқ. Эътиборли жиҳати, мазкур легионерларнинг қай бири билан шартнома имзоланган тақдирда, бу ўйинчи олий лигамиз тарихидаги илк япониялик ёки жанубий кореялик футболчига айланади", деб ёзади "Пахтакор" матбуот хизмати.

Сербиялик Боян Миладинович, грузиялик Кахи Махарадзе ва черногориялик Санибал Ораховацнинг "Пахтакор" билан амалда шартномаси бор. Ўтган мавсумнинг иккинчи ярмидан жамоада ижара асосида тўп сурган "Анжи"нинг грузиялик ярим ҳимоячиси - Иракли Климиашвилининг 2012 йилги мавсумни Тошкентда ўтказиш имконияти, "Пахтакор" расмий сайтига кўра, жуда ҳам катта.

Эслатиб ўтамиз, ОЧЛда иштирок этувчи жамоалар камида битта осиёлик ва кўпи билан учта осиёлик бўлмаган, жами тўрта нафар легионер хизматидан фойдаланиши мумкин. 2012 йилдан эътиборан Олий Лига баҳсларида ҳам легионерлар лимити худди шу даражага туширилди.