Англия чемпионатининг 29-туридан ўрин олган «Вулверхэмптон» ва «Ливерпуль» жамоалари ўртасидаги ўйинда (0:1) мезбонлар посбони Руи Патрисиу жароҳат олгани туфайли баҳс чўзилиб кетди.

Учрашувнинг 86-дақиқасида португалиялик посбон ўз жамоаси ҳимоячиси Конор Кауди билан тўқнаш кетди (ҳимоячининг тиззаси Патрисиунинг бошига тегди). Унга тиббий ёрдам кўрсатиш жараёни 15 дақиқа давом этди. 101-дақиқада уни замбилда майдондан олиб чиқиб кетишди.

Мезбонлар бош мураббийи Нуну Эшпириту Санту барча 3 алмаштиришни амалга ошириб бўлганига қарамай, «Вулвз» захира посбонини майдонга тушира олди. Чунки, янги қоидага кўра, футболчи мия чайқалиш жароҳатини олганида, қўшимча ўзгариш қилишга рухсат берилган.

Ўйиндан кейин "Вулверхэмптон" бош мураббийи дарвозабоннинг аҳволи ҳақида маълумот бериб ўтди.

«Ҳозиргина унинг аҳволи ҳақида маълумот олдик: унинг ҳолати яхши. У ҳушида ва барчасини эсламоқда. У тезда тикланади», – деди Нуну.

Патрисиу АПЛнинг жорий мавсумида 29та ўйинда майдонга тушиб, 9та баҳсда дарвоза дахлсизлигини сақлаб қолди.