Россиянинг “Спорт-Экспресс” нашри 2004 йилдан бери “Звезда” совринини футбочлиларга топшириб келади. Ушбу танлов МДҲ ва Болтиқбўйи давлатларининг энг яхши футболчисини аниқлашга қаратилган бўлиб, унда собиқ иттифоқнинг 15та спортга оид ОАВлари иштирок этишади.
Ҳар ой якуни бўйича ўтказиладиган танловда ҳар бир давлатдан битта ОАВ овоз бериш ҳуқуқига эга бўлса, йиллик сўровномада эса ҳар бир мамлакатдан 3тадан ОАВ иштирок этишидан хабарингиз бор.
2011 йилда Ўзбекистон ва “Анжи” клубининг энг яхши футболчиси деб топилган Одил Аҳмедов “Звезда” танловида маълум очколарни тўплашга муваффақ бўлди. Ҳамюртимиз 26 очко билан сўровномада 7-ўринни қўлга киритди. Аҳмедовга 3 марта биринчи, 2 марта учинчи, 2 марта – тўртинчи ва 1 марта бешинчи ўринни беришган. Табиийки, ҳамюртимизга 3 та 1-ўринни ўзбек нашрлари беришган. Учинчи ўринни эса Озарбойжон ва Қирғизистоннинг биттадан ОАВ вакиллари беришган бўлса, Туркманистон ва Тожикистоннинг биттадан газеталари ҳамюртимизни тўртинчи ўринда кўрсатишган. Шунингдек, Тожикистоннинг “Азия-плюс” нашри ҳамюртимизни 5-ўринга лойиқ кўрган.
2011 йилги “Звезда” соврини Москванинг “Динамо” ва Украина терма жамоаси футболчиси Андрей Воронинга насиб қилди. У сўровномага номлари киритилган бошқа футболчиларни катта фарқ билан ортда қолдирди. Воронин 175 очко жамғарди. Иккинчи ўрин Александр Кержаковга насиб қилди. “Зенит” футболчиси ҳисобида 119 балл тўпланди.
Кейинги ўрин ҳам “Зенит” футболчисига насиб этди. Дарвозабон Вячеслав Малафеев 63 баллга эга бўлди. Тўртинчи ўринни эгаллаган Анатолий Тимошчук эса Малафеевдан 2 очко кам жамғарди. Аҳмедовдан олдинги ўринларни, шунингдек, Алан Дзагоев ва Игорь Денисов қўлга киритишди.
СЎРОВНОМА ЯКУНЛАРИ
| Ўйинчи | 1-ўрин | 2-ўрин | 3-ўрин | 4-ўрин | 5-ўрин | жами |
|---|---|---|---|---|---|---|
| 1. Андрей ВОРОНИН | 23 | 6 | 10 | 2 | 2 | 175 |
| 2. Александр КЕРЖАКОВ | 9 | 11 | 5 | 7 | 1 | 119 |
| 3. Вячеслав МАЛАФЕЕВ | 3 | 8 | 3 | 2 | 3 | 63 |
| 4. Анатолий ТИМОШЧУК | - | 6 | 7 | 6 | 4 | 61 |
| 5. Алан ДЗАГОЕВ | - | 2 | 3 | 4 | 8 | 33 |
| 6. Игорь ДЕНИСОВ | - | 2 | 4 | 3 | 2 | 29 |
| 7. Одил АҲМЕДОВ | 3 | - | 2 | 2 | 1 | 26 |
| 8. Роман ПАВЛЮЧЕНКО | 2 | - | 3 | 2 | 2 | 25 |
| 9. Генрих МХИТАРЯН | 3 | - | - | - | 5 | 20 |
| 10. Андрей АРШАВИН | - | 2 | 1 | 1 | 4 | 17 |
| 11. Роман ШИРОКОВ | - | 1 | 1 | 4 | 2 | 17 |
| 12. Сергей ИГНАШЕВИЧ | - | 2 | 1 | 2 | 1 | 16 |
| 13. Игорь АКИНФЕЕВ | - | 1 | 3 | - | 3 | 16 |
| 14. Дмитрий БУЛИКИН | - | 2 | - | 2 | 1 | 13 |
| 15. Александр РИБКА | 1 | - | - | 2 | - | 9 |
| 16. Андрей ЯРМОЛЕНКО | - | 1 | 1 | - | 1 | 8 |
| 17. Александр САМЕДОВ | - | 1 | - | 1 | 2 | 8 |
| 18. Юрий ЖИРКОВ | - | - | - | 2 | 3 | 7 |
| 19. Андрей ДИКАНЬ | - | - | - | 3 | - | 6 |
| 20. Константин ВАСИЛЬЕВ | 1 | - | - | - | - | 5 |
| 21. Игорь СЕМШОВ | - | - | 1 | - | - | 3 |
