Хабарингиз бор, Тошкентнинг "Бунёдкор" клуби 18-23 январь кунлари "Dubai Mаtch World Cup 2012" мусобақасида иштирок этади ва уларнинг гуруҳдаги рақибларидан бири - "Зенит". Санкт-Петербургликлар бош мураббийи Лучано Спаллети мусобақа ва ундаги рақиблар ҳақида ўз фикрларини билдириб ўтди.

— Ушбу мусобақа Россия чемпионати ва Чемпионлар лигасининг плей-офф босқичи учун тайёргарликнинг муҳим босқичи ҳисобланади. Ушбу мусобақаларда биз кучли рақиблар билан куч синашамиз. Дубайдаги мусобақа эса Чемпионлар лигасининг 1/8 финали доирасида "Бенфика"га қарши яхши тайёргарлик кўриш учун ёрдам беришига ишонаман.

— Андрей Аршавин "Арсенал"ни тарк этиши мумкинлиги ҳақида миш-мишлар тарқалди. Сиз уни "Зенит"га қабул қилишга тайёрмисиз?
— Аршавин — яхши футболчи. Мен у ҳақда ижобий фикрга эгаман, "Зенит" мухлислари эса уни янада қадрлашади. Лекин ҳозир унинг қайтиши мумкинлигини муҳокама қиладиган пайт эмас. Олдимизда "Бенфика"га қарши 2та масъулиятли ўйинлар кутиб турибди. Ўйлайманки, ҳозирги таркибимиз кучли ва у билан яхши натижага эришиш мумкин.

— Мусобақадаги илк рақиб — Ўзбекистон чемпиони "Бунёдкор" ҳақида нима дея оласиз?
— Бу жамоа бош мураббийи Миржалол Қосимовнинг имкониятларини яхши биламан. Ҳар қандай ҳолатда ҳам унга жарима тўпини тепиш имконини бермаслик керак (кулади). "Бунёдкор" футболчиларининг имкониятларини эса яхши билмайман. Лекин ишончим комил, "Зенит" футболчилари мураббийнинг кўрсатмаларисиз ҳам рақибга нисбатан қандай ўйнаш кераклигини яхши билишади.