Хабарингиз бор Тошкентнинг "Локомотив" клуби Ўзбекистон Республикаси Президентининг 1466 сонли қарори асосида 2009 йилнинг сентябр ойида ўзининг янги стадиони қурилишини бошлаб юборганди. Ҳозирги вақтга келиб "Локо"нинг янги стадионида қурилиш таъмирлаш ишлари деярли ўз ниҳоясига етган.
"Темирйўлчилар"нинг янги ўйингоҳи саккиз минг томошабинга мўлжалланган. Майдон чими устида кореялик мутахассислар иш олиб боришаётганини таъкидлаш лозим. Шунингдек, клуб томонидан 500 квадрат метр майдонга захира чими ётқизилган.
Стадион хорижий компаниялар махсулотлари билан жиҳозланган бўлиб, хусусан ўйингоҳ таблоси ҳамда ёритиш мосламалари машхур Philips компаниясига тегишли.
Стадионнинг умумий майдони 5 ярим гектардан ошади. 280 та ишқибозлар автомобилларига мўлжалланган тўхташ жойи ҳам барпо этилган.
Тошкентнинг ТТЗ даҳасида жойлашган мазкур стадион шу йилнинг март ойидан бошлаб ишга тушади. Стадионда ўз майдони таъмирлаш ишлари туфайли бир муддатга ёпиладиган "Пахтакор" ҳам чемпионат ўйинларини ўтказиб туради.
"Локомотив" янги мавсум давомида ўз машғлотларини Тошкент вилоятида жойлашган "Дўсилик" стадионида ўтказади.
