«Манчестер Сити» Англия Премьер-лигаси доирасидаги сўнгги тур учрашувида «Тоттенҳэм» устидан 3:2 ҳисобида ғалаба қозониб, мавсум бошидан бери ўз майдонидаги кетма-кет ғалабалар сонини 11 учрашувга етказди.
Англия Премьер-лигасида бундай серия сўнгги бора 2005/06 йилги мавсумда «Челси» томонидан қайд этилганди.
Ушбу кўрсаткич бўйича рекорд натижа «Ньюкасл Юнайтед»га тегишли бўлиб, «қарғалар» 1995/96 йилги мавсумда ўз майдонларидаги кетма-кет 13 та учрашувда очко йўқотишмаган.
«Манчестер Сити» ўз майдонида бўлиб ўтган 11 учрашув давомида рақиблар дарвозасини 34 марта ишғол этган бўлиб, атиги олти марта ўз дарвозасидан тўп ўтказиб юборган. Жамоа айни вақтда Англия Премьер-лигасида пешқадамлик қилиб турибди ва чемпионликка асосий даъвогарлардан бири ҳисобланмоқда.