Суперлиганинг 5-тури доирасидаги қолдирилган "Турон" – АГМК (0:1) ўйинидан сўнг мезбонлар бош мураббийи Ислом Исмоилов ўз фикрларини билдириб ўтди.

"Афсуски, жамоа 7-турдан буён ғалаба қозона олмаяпти. Мухлисларимиз бунга лойиқ эмас, мана бугун ҳам ноқулай об-ҳаво шароитига қарамай, келиб, бизни қўллаб-қувватлашди. Умид қиламизки, жамоанинг ғалабали онлари ҳали олдинда ва уларни хурсанд қиламиз.

Ўйинга келсак, ёмон бошламадик, биринчи бўлимда тўлиқ назоратни қўлга олдик, бир қанча вазиятларни яратдик. Лекин бу – футбол, ундан ҳар доим яхши ўйнаган жамоа ғолиб чиқмайди. Демак, ниманидир нотўғри қиляпмиз, шу боис мағлубиятга учрадик. Барча айбни ўз зиммамга оламан.

Футболчилар билан гаплашиб олдик, 2 кундан кейин бизни яна бир ўйин кутмоқда. Бу нарса руҳий ҳолатимизга таъсир қилмаслиги керак. Ввазиятдан чиқиб кетиш учун ҳаракат қиламиз", - дейди Ислом Исмоилов.