Барибир Испанияда кимдир чемпион бўлади, лекин, бу йил ҳақиқий чемпионларга хос ўйин кўрсатаётган жамоа Ла Лигада йўқ деган бўлардим.

Нимадан билиш мумкин? Масалан, «Атлетико»да охирги 45 ўйинда атиги 2 йирик ғалаба бор, «Реал»да охирги 35 ўйинда бир дона. «Барселона» умуман охирги 8 ўйинда атиги бир маротаба ишончли ўйин кўрсатди холос - икки мағлубият, икки дуранг, икки камбэк.

Ишончли, бошқача айтганда, «ишчи ғалабалар» ҳар қандай чемпионда кўп бўлиши керак. Бу барқарорликдан дарак - айтайлик, 10 ўйиндан 6 таси мана шундай «ишчи ғалаба», 2 тасида қийналиб ютилади, 2 тасида майли, очко йўқотилиши мумкин.

Испания грандлари эса, ҳамма ўйинда қийналишмоқда, демак, очко йўқотиш эҳтимоли ҳам ошади. Бу шуни англатадики, ҳали «Реал» ҳам, «Атлетико» ҳам, қолган нечтадир ўйинни ютади, дейиш мушкул. Катта эҳтимол, бу мавсум чемпионлик бир жамоа томонидан ютилмайди, икки жамоа томонидан ютқазилади.

Толстой айтганидек, бахтсиз оилаларнинг ҳар бири ўзгача бахтсиз, сабаблар ҳар хил, лекин умумийлик бор. Пандемия ўз таъсирини кўрсатмай қолмади. Айнан шу фактордан келиб чиқсак, «Манчестер Сити», «Бавария» ва «Интер»га қойил қолиш керак.

Қаҳрамон Асланов.