Айниқса, Азиз Ҳайдаров тўп сураётган клуб – «Аш-Шабоб», терма жамоамизнинг бошқа ярим ҳимоячиси Темур Кападзени яқиндагина сафига қўшиб олган «Аш-Шаржа» устидан йирик ғалабага эришди...

Бу воқеалар бугун БААнинг «Emirates Cup» турнирида содир бўлди. Аввало 4-мавсумдан буён янгича форматда ташкиллаштирилаётган Амирлик кубоги ва унинг ўтказилиш шакли ҳақида икки оғиз тушунтириш бериб ўтсак.

Амирлик Про-Лигасидаги 12 та клуб олтитадан икки гуруҳга бўлинган ҳолда кубок мусобақаларига киришиади. Ҳар бир клуб рақиблари билан уй-сафар тизимида 10 тадан учрашув ўтказишади. Гуруҳларда 1-2 ўринни қўлга киритган жамоалар ярим финалга йўл олишади. Ҳаммаси оддий. БАА футбол мутасаддилари шу йўл билан ОФК талаби —жамоаларнинг ҳар бири мавсумда камида 32 та расмий учрашувда майдонга тушишини таъминлай олганлар.

Азиз Ҳайдаров тўп сураётган «Аш-Шабоб» «В» гуруҳида яққол пешқадам бўлиб турибди. Улар бугун чемпионатда ҳам, кубокда ҳам ишлари юришмаётган «Аш-Шаржа»ни қабул қилишда ва улар дарвозасига жавобсиз 3 та тўп йўллашди.

Улуғбек Бақоевни ўз таркибига қўшган «Дубай Клаб» эса Марадона шогирдлари майдонига сафар қилишди ва 0:3 ҳисобида йирик ғалаба қозониб қайтишди.

Кеча ва бугун бўлиб ўтган 7-тур учрашувлар натижалари билан танишинг:

«А» гуруҳи
АМИРЛИК – АЛ-ВАҲДА 0:2
АЛ-ЖАЗИЙРА – АЛ-АЙН 1:0
АЛ-ВАСЛ – ДУБАЙ КЛАБ 0:3

«В» гуруҳи
АЖМАН – АН-НАСР 1:1
АШ-ШАБОБ – АШ-ШАРЖА 3:0
БАНИ ЯС – АЛ-АҲЛИЙ учрашуви бугун тошкент вақти билан соат 21:00 да бошланади

«А» гуруҳида 7 учрашувдан сўнг «Ал-Жазийра» 16 очко билан пешқадамлик қилмоқда. 12 очкого эга «Дубай Клаб» ярим финалга чиқиш учун яхши имконият ҳосил қилган

«В» гуруҳида 7 учрашувдан сўнг «Аш-Шабоб» ҳам 16 очко тўплаб биринчи ўринда турибди. «Ал-Аҳлий» агар бугун меҳмонда ғалаба қозонса 13 очко билан иккинчи ўринга кўтарилиб олади. Ҳозирча бу ўринни 7 ўйиндан сўнг 12 очко жамғарган «Ажман» банд этиб турибди.