28 январь, шанба куни Африка Миллатлар Кубоги гуруҳ босқичи 2-туридан ўрин олган сўнгги икки учрашувнинг дастлабкиси якунига етди. Ўйин давомида етти маротаба дарвозалар аниқ нишонга олинган Ботсвана – Гвинея баҳси мусобақанинг энг сермаҳсул ўйини бўлиб турибди.

Садио Диаллонинг дубли, Абдул Камара, Иброҳим Траоре, Мамаду Ба, Наби Суманинг голларига Ботсвана терма жамоаси аъзолари фақат бир марта жавоб бера олишди. Дипси Селолване томонидан 23-дақиқада пенальтидан урилган гол 27-дақиқагача ҳисобнинг 1:1 бўлиб туришини таъминлади, холос.

Ушбу натижа Гвинея учун мусобақадаги илк ғалаба, ботсваналиклар учун иккинчи мағлубият бўлди. Агар гуруҳнинг Гана ва Мали терма жамоалари ўртасидаги учрашувда Мали ғалаба қозонса, Ботсвана мусобақа билан амалда хайрлашиб бўлади, агар Гана ғалаба қозонадиган бўлса, Ботсванада чорак финал йўлланмаси учун назарий имкониятлар қолади.

Таъкидлаш жоиз, Африка Миллатлар Кубогининг бу йилги баҳсларида ҳали бирорта учрашувда дарвозаларга бештадан ортиқ гол урилмаганди.

3-турда Ботсвана Малига қарши майдонга ушса, Гана Гвинея билан баҳс олиб боради. Ўйинлар 1 февраль куни бўлиб ўтади.

Африка Миллатлар Кубоги-2012
«D» гуруҳи, 2-тур

БОТСВАНА – ГВИНЕЯ 1:6 (1:4)
Голлар: Селолване (23) — Диалло (15, 27), Камара (42), Траоре (45+3), М. Ба (84), Сума (86)