Ҳужум қилаётган жамоа вакилининг қўлига тўп бехосдан тегиб кетиши оқибатида голлар бекор қилиниши сизни ҳам безор қилганмиди ? Энди бундай бўлмайди.

Март ойидаёқ ИФАБ (Халқаро футбол ассоциацияси иттифоқи) футболнинг мазкур қоидаларига ўзгариш киритилишини маълум қилганди. Унга кўра, қоидалар бироз юмшатилиши кўзда тутилган. Бу янгилик футбол оламида 1 июль санасидан бошлаб, Европа чемпионати учун 11 июндан бошлаб кучга киради.

“Бехосдан тўпнинг қўлга тегиб кетиши, эндиликда қоида бузилиши деб қаралмайди ва гол билан ҳужум бекор бўлишига сабаб бўла олмайди”, – дейилади ИФАБ сайтида.

Қуйидаги ҳолатлардагина қўл билан ўйин қоидаси бузилган деб ҳисобланади:

– футболчининг онгли равишда қўл билан тўпга тегиниши, қўлини тўп томонга ҳаракатлантириши;

– тўп футболчининг қўлига тегса ва буни эвазига у танасининг атрофидаги майдонни катталашишига эришган бўлса;

– агар футболчининг қўли нотабиий ҳолатда бўлганида унинг қўлига тўп келиб тегса;

– агар тўп ҳужум уюштираётган футболчининг қўлига тегиб дарвозадан жой олса,

– агар тўп қўлга тегиши оқибатида ҳужум уюштираётган ёки ҳимояланаётган жамоа устунликка эга бўлса, бу ҳолатдаги бехосдан тўпга тегиниш ҳам қоидабузарлик сифатида қайд этилади;

Агар тўп ҳужум уюштираётган жамоа футболчисининг қўлига бехосдан тегиб кетса ва бу тегиниш тўғридан тўғри голга сабаб бўлиб қолмаса бу қоидабузарликка кирмайди.