Кеча Ўзбекистон миллий жамоаси Сингапурга қарши ўйин ўтказар экан ижтимоий тармоқда бу бош мавзуга айланди, балки. Твиттерда нисбатан фаол бўлганим боис уни кўпроқ кузатдим бу вақт. Ўйин вақти ва у тугагач яқин 1-2 соатда минглаб твитлар учрашув атрофида ёзилди, менимча. Улар ичида иккитаси алоҳида эътиборимни тортди.
Биридаги мазмун қуйидагича эди: таркибимизда А сериядаги илк мавсумида яхши кўрсаткич қайд этган ва шунинг учун бир қатор Европа жамоаларини қизиқтириши мумкин бўлган Элдор Шомуродовнинг борлиги бу бошқа футболчиларга ҳам имконият беради. Элдор боис ўйинни кузатган скаутлар, мутахассислар шу баҳонада Жалолиддин Машариповнинг ўйинларини кўришди. Ва менимча кеча Жалолиддин майдондаги энг яхшиларимиздан бўлди. Шу баҳонада Икром Алибоев балки кўпларнинг нигоҳига тушар. Икром ҳам кеча энг яхши ўйинларидан бирини ўтказди, чоғи.
Иккинчи твитни матни билан келтираман. “Сингапурнинг биз каби термаси бўлиб, бизнинг Сингапур каби иқтисодимиз бўлсайди, мисол учун”.
Асли биз қандай ютишимиз керак бўлса шундай ютдик, менимча. Ишончли, осон ва чиройли. Сингапурдан кучли эканимиз ва терма жамоа фонида тугал хулосаларни қилолмаслигимиз маълум эди. Кўп эҳтимол Яман билан ҳам шундай бўлади. Ҳақиқий кучимиз эса сўнгги турда Саудия Арабистонига қарши ўйинда кўринса керак.
Ҳа, дарвоқе, кеча рақиб ҳаддан зиёд қўпол ўйнади. Мен шу каби ўйинни Ямандан ҳам кутяпман. Эҳтиёт бўлиб, етакчиларни эҳтиёт қилиб учинчи учрашувга етиб олишимиз керак.
Йигитлар, яхши бошладингиз. Кўрдик. Завқ олдик. Бу ўйиндан кўпчилик қувонди! Бундан ҳам яхшироқ бўлишига масалан мен ишонаман. Кейинги ўйинларда ҳам УзРепорт ТВда бирга қўллаб-қувватлаймиз.
Ориф Толипов
