Бугун Бразилия ва Венесуэла терма жамоалари ўртасидаги учрашув билан "Копа Америка" турнири старт олади. Балки, мазкур турнир савия ва томошабоплик жиҳатдан Европа чемпионатининг фонида қолиб кетар, аммо унутмаслик керакки бу турнирда ҳам анча кучли терма жамоалар мавжуд. Биргина Аргентинанинг ўзи ўз етакчиси билан бу совринни ютишга жиддий бел боғлаган. Келинг, ўша Месси ва бутун Аргентина учун аламли бўлган онларни эслаб ўтамиз.

Ўша финалдан ҳотиралар

Аргентина 2014 йилда Жаҳон чемпионати финалида мағлуб бўлгани кўпчиликнинг ҳамон кўз ўнгида бўлса керак. Мессининг кўз ёшлари, сўнгги дақиқаларда ўтказиб юборилган гол, ҳаммаси Жанубий Америкаликлар учун аламли бўлган эди. Қутуриб кетган немисларга қарши тўп тепган Лео ва унинг жамоадошлари ўшанда матонатли ўйин кўрсатган эди ва ҳатто ўша даҳшатли Германиядан яхшироқ ўйнаганини таъкидлаб ўтиш жоиз. Ҳаммаси пенальтиларга қараб кетаётган бир пайтда Гётценинг голи ва ҳаммаси тугади. Ҳамон кўз олдимда Мессининг кўз ёшлари, аммо бу ҳали ҳаммаси эмас эди...

Чилидан қабул қилиб олинган зарба

2015 йили Аргентина терма жамоаси Жанубий Америка минтақасида ҳақиқий етакчи эди. Таркиб ва ўйин тарафлама уларга қарши чиқа оладиган бирор терма жамоа йўқ бўлган десам адашмаган бўламан. Ҳаттоки ўша Бразилия ҳам ҳеч қанақасига Месси ва унинг жамоадошларига қаршилик кўрсата олмаётган эди. Катта қийинчилисиз финалга борган Аргентинани финалда Чили кутиб турар эди. Ярим финалда Парагвайни 6-1 ҳисобида тор-мор этган Месси жамоадошлари финалда анча қийинчиликларга дуч келди. Рақиб шунчаки ҳимояга ётиб олиб вақтни ўтказар ва ҳаммасини пенальтилар сериясига қараб кетарди. Пенальтилар сериясида эса Чили Аргентинага ҳеч қанақасига имкония қолдирмади. Ромеро дарвозасига чилиликлар 4 та гол урган бўлса, Браво дарвозасини аргентиналиклар атиги 1 маротаба ишғол қила олди. Аламли онлар ҳамон ўз якунига етмаган эди...

Чилидан қабул қилиб олинган зарба 2

2016 йили Америка футбол Ассоциациянинг юбилейи шарафига Конкакаф ва Конмебол минтақалари ўртасида қўшма турнир ташкил қилинди. Аргентина бу сафар ҳам йўлидан чиққан рақибни янчиб ташлайверди. Ўша Чилининг ўзи илк турда Аргентинага 2-1 ҳисобида мағлуб бўлди. Кейинги ўйинларда эса Панама 5 та Боливия 3 та жавобсиз гол қабул қилиб олди. Чорак финалда Венесэла юлдузларга тўла жамоа дарвозасига 1 та гол уришга муваффақ бўлди, аммо ўша юлдузлар бунга 4 та гол билан жавоб берди. Ярим финалда эса АҚШ уларга қарши майдонга чиқди. АҚШ жуда кучли давлат. Албатта, иқтисодиёт, сиёсат ва ҳарбий салоҳият тарафлама, футбол тарафлама эса Аргентина улардан бир бош устун эди. Мессининг жаримадан супер голи ва яна 3 та гол ҳисобни 4-0 кўринишига келтирди. Ҳаммаси яхши давом этарди, улар билан бастлашадиган жамоа ҳар ҳолда Конмеболда йўқ эди, аммо финалда яна ўша Чили эди. Бу эса ҳал қилувчи ўйин қийин бўлишидан далолат берар эди. Шундай ҳам бўлди, Месси ва унинг жамоадошлари 120 дақиқа давомида Конмебол "қизиллари" дарвозасига йўл топа олмади. Энди нима бўлади? Албатта, пенальтилар серияси ва кейин нима бўлади? Албатта, Чили ғалаба қозонади. Бу сафар ҳам Чили 4 та гол урди, Аргентинада эса прогресс бор эди. Бу сафар улар 2 та гол билан жавоб берди. Илк зарбани Чилидан Санчес йўллаган ва ушбу зарба муваффақиятсиз якунига етган эди, Аргентинадан бу масълиятни Месси ўз бўйнига олди ва ноаниқ зарба. Шундан сўнг, Чили адашмади ва кетма-кет иккинчи бор Жанубий Америкада тенгсиз деб топилди. Лео эса кўз ёшларини тийиб тура олмади. Футболга меҳри бўлган ҳар қандай инсоннин кўнглини ғаш қиладиган ҳолат эди бу.

Месси охири ёрилди

2019 йилда яна "Копа Америка" турнири ўтказилди ва бу сафар Месси ва унинг жамоаси анчагина кучсизланиб қолди. Лионель Скалони бошчилигидаги мазкур терма жамоага энди фаворит сифатида қаралмаётган эди. Улар илк турда Колумбияга 2-0 ҳисобида мағлуб бўлди, сўнгра эса Парагвай билан амаллаб дуранг натижа қайд этди. Фақатгина, меҳмон бўлиб турнирга ташриф буюрган Қатар уларга мағлуб бўлди. Жамоа чорак финалда Лаутаро ва Ло Чельсонинг голлари эвазига ғалаба қозониб, ярим финалга етиб келди. Бразилия билан ўйинда эса улар 2-0 ҳисобида имкониятни бой берди, аммо ўшанда иккита берилиши керак бўлган пенальтидан ҳеч бўлмаганда биттаси Аргентиналикларга берилмади. Жамоа сардорининг бундан жаҳли чиқди. "Селесао" анча кучли ўйин кўрсатган бўлсада, ўша епизодларда 11 метрлик жарима зарбаси бор эди. Эътирозлар энди фойдасиз, улар финалдан маҳрум қолди. 3-ўрин учун ўйинда уларни ким қарши олди деб ўйлайсиз? Аргентиналикларнинг қўрқинчили туши бўлмиш Чили яна якунловчи ўйинда уларга қарши, бироқ бу финал эмас, бронза медаллари учун ўйин эди. Балки, шу сабаб бу ўйинда "альбиселесте" ғалаба қозонгандир. Шундай қилиб, Аргентина бронза медални қўлга киритди, аммо Лео бу номни ўзига эп кўрмади. Ўйин пайти Медель ва Месси ўзаро тортишиб қолади. Гарри Леога нисбатан анча агрессив муносабатда бўлади ва Месси ҳам бироз қизишиб кетгани рост, аммо бунда "Барселона" афсонаси қизилга лойиқ эмас эди. Албатта, бу субъектив фикр. Бундай эпизодлар футболда тез-тез бўлиб туради. Уларнинг ҳаммаси учун ҳам футболчилар майдондан четлатилмайди. Шу ўйиндан сўнг аргентиналик юлдуз Конмебол раҳбариятини пораҳорлик ва келишилган ўйинларда айблайди. Леонинг бу гаплари қанчалик ҳақиқатлиги бизга номаълум, аммо бу минтақа футбол ассоциатцияси абсурд қарорлари билан ҳар доим ҳайрон қолдириб келган. Балки, бу абсурдлар ортида Лео таъкидлаган адолатсизликлар ястаниб ётгандир. Буёғи биз учун қоронғу.

Сўнгги имконият

Месси айни дамда 33 ёшда ва катта эҳтимол ушбу "Копа Америка" у учун сўнггиси бўлади. Балки, бу Лео учун сўнгги имкониятдир. Маҳорат бобида беназир ва афсонавий футболчининг ўз терма жамоаси сафида ҳам соврин ютиши бу футболнинг адолати бўлар эди. Ҳар ҳолда, Аргентина ҳам, Месси ҳам сўнгги йилларда ушбу совринга лойиқ эди. Кўрамиз, бу сафар нима бўлади. Кўз ёшлар ва омадсизликлар якунига етадими ёки давом этадими? Буни ушбу турнир сўнгида билиб оламиз.

Эсатиб ўтамиз, турнирнинг илк ўйини эртага Тошкент вақти билан 02:00да Бразилия- Венесуэла ўйини билан старт олади.

                                                                                 Худайқулов КАРИМ мақоласи