“Қўқон-1912” – “Турон” жамоалари ўртасидаги учрашувдан сўнг ўтказилган матбуот анжуманининг биринчи қисмида яйпанликлар устози Игорь Шквирин қатнашди.

"Бугун жанговор ўйин бўлишини билардик. Чунки Қўқон дербиси бўлди. Футболчиларим майдонда борини бериб ўйнади. Шу томонлама уларга эътирозим йўқ. Натижага келадиган бўлсак, 2:1 ҳисобида ғалаба қозонаётганимизда 8 дақиқа қолганди. Шунинг учун ҳисобни ушлаб қола олмаганимиздан бироз хафамиз. Пастдаги поғоналарда турган жамоаларда рақобат яхши. Чунки ҳар бир учрашувда очко олиняпти.

Натижадан қониқмадим демоқчи эмасман. Чунки ҳар бир очко олтинга тенг. Бугунги ўйинда қўқонликларда ҳам имкониятлар бўлди. Биз ўзимизга қийинчилик туғдиряпмиз. Абдурашидовга бир ойдан бери ўйин қоидасини бузма, деб таъкидлаб келяпмиз. Яна қоида бузди, жарима тўпидан гол ўтказдик.

Дарвозабонларга келсак, хатолар бўлди. Лекин бизни голдан қутқариб қолган вазиятлар ҳам бўлди. Хатолар устида ишлашяпти. Голларда дарвозабонни айбламайман", — деди Шквирин.



Бахтиёр Ашурматов: "Бизга ғалаба керак эди"

“Қўқон-1912” – “Турон” жамоалари ўртасидаги учрашувдан сўнг ўтказилган матбуот анжуманининг иккинчи қисмида , Қўқонликлар бош мураббийи Бахтиёр Ашурматов иштирок этди.

- Очиғи, охирги пайтлардаги муваффақиятсиз ўйинларимиздан кейин бугун уйимизда ўйнайдиган услубимиздан воз кечишга қарор қилдик. Рақиб сафида Билолхон Тошмирзаев, Суннат Абдуллажонов каби тезкор футболчилар борлигини инобатга олиб, қарши ҳужумларга тушиб қолмаслигимиз учун биз ҳам иккинчи рақамда тўп суришга қарор қилдик.

Ҳужумда Норбеков ва Ҳасанов сингари тезкор футболчиларимизнинг тезлигидан фойдаланишга ҳаракат қилдик. Сабр қилишимиз кераклигини ва гол бўлгач, ўйин осонроқ ўтишини таъкидлагандим. Кутган вазиятимиз бўлди ва биз биринчи бўлиб гол урдик. Аммо футбол хатолардан иборатки, ҳатто майда хатоларни ҳам рақиб кечирмаслиги мумкин. Гол урганимиздан кейин ҳимоя ва ярим ҳимояни кучайтиришга ҳаракат қилиб тургандик. Афсуски, тезкор гол ўтказиб юбордик.

Худога шукр, ютқазиб турган пайтимизда яна жавоб голини уриб дурангга эришдик. Бизга ғалаба керак эди. Аммо охирги учрашувлардаги муваффақиятсизликдан кейин бугунги дуранг ёмон эмас. Агар яна ютқазганимизда жамоа тушкунликка тушиб қолиши мумкин эди. Футболчиларга охиригача курашишгани учун миннатдорчилик билдираман. Ҳар бир ўйинда мана шундай курашишса, очколарни қўлга кирита оламиз. “Турон” жамоасига ҳам омад тилайман. Қўшни жамоаларнинг натижаларига бефарқ эмасман. Дуранг адолатли натижа бўлди. Иккала жамоа ҳам охиригача курашди.