Бразилияда ҳурмат қозонган “Гигант” футболчилар
Бразилия футболида кимнидир ҳайратга солиш, ном қозониб эл орасида машҳур бўлиш осон иш эмас.
Чунки мамлакатда ҳар йили юзлаб янги иқтидорлар кашф қилинади. Уларнинг орасидан порлаб чиқиш учун футболчи алоҳида хусусиятларга, бетакрор иқтидорга эга бўлиши лозим. Лекин мамлакатда бир жамоа борки, гарчи катталар футболида иштирок этмасада, бразилияликларнинг ёқимтойига айланган. “Шимол гигантлари” номли жамоанинг ўзига хослиги шундаки, унда асосан бўйи паст футболчилар тўпланишган. Белем шаҳри шарафини ҳимоя қилувчи паканалар ҳозирда 13 ёшгача бўлган болалар чемпионатида иштирок этиб келишмоқда.
Эътиборли томони, ушбу жамоа учрашувларида мухлсилар ҳар доим стадионни тўлдириб ўтиришади. Бўй-басти баравар бўлган “оталар” ва “болалар” қарама-қаршилигини кузатиш кимга ҳам қизиқ эмас дейсиз! Тажрибали мураббий Карлос Лучена қўли остида ана шундай ўзига хос жамоани ташкил этишдан асосий мақсад “камтар бўйли” инсонларнинг жамиятда ўз ўринларини топишларга кўмаклашишдан иборат.