Бир замонлар Лондоннинг “Арсенал” клубида тўп сурган швециялик футболчи Фредрик Юнгберг Япониянинг “Шимидзу С-Палс” клубидан кетди.  34 ёшли ҳужумчи бу клубда 11 та ўйинда майдонга тушди холос.

 У клуб раҳбарияти билан келишган ҳолда шартномани бекор қилишга қарор қилди. “Японияда ўзимни яхши ҳис қилдим, жамоадошларим ва мураббийларга нисбатан ҳурматим чексиз, лекин клубимиз Осиё чемпионлар Лигасида иштирок этмайди, унинг устига клубдаги ўйиним унчалик ўзимга маъқул эмас, шу боис бу клубда ўйнашни тўғри қарор деб ўйламайман” деди Юнгберг. 

75 марта Швеция терма жамоаси сафида майдонга тушган футболчи “Арсенал” сафида 9 йил тўп сургандан сўнг 2007 йилда “Вест Хэм”га ўтганди.  Кейин Бекхэмга ўхшаб ўз бахтини излаб АҚШга ҳам йўл олди. “Сиэтл Саундерс” ва “Чикаго Файр” клубларида фаолият олиб борди. Лекин 50 дан ортиқ учрашувда атиги 4 та гол киритди. Кейин “Селтик” сафига қўшилди. Бу жамоада 7 та ўйинда майдонга тушди ва Японияга йўл олди.