ОФК томонидан Марказий Осиё минтақаси учун анъанавий ташкил этиладиган футбол фестивалига бу йил Покистон пойтахти Исломобод шаҳри мезбонлик қилади.
2-15 апрель кунлари бўлиб ўтадиган мусобақада Афғонистон, Эрон, Қирғизистон, Покистон, Тожикистон, Туркманистон ва Ўзбекистондан ўсмирлар (14 ёшгача) иштирок этишади. Бу йилги фестивалда Темур Алимхўжаев қўл остидаги ўсмирлар терма жамоаси Ўзбекистон шарафини ҳимоя қилади.
Ёш футболчилар ўртасидаги мусобақалар билан бир вақтда, Фестивал ва “Келажак” лойиҳаси доирасида ёш мураббийлар ва ҳакамлар курслари ҳам бўлиб ўтади. Фестивалда иштирок этувчи ҳар бир мамлакат икки нафардан мураббий ва икки нафардан ҳакамни курсларга жўнатади.
Эслатиб ўтамиз, ўтган тўрт йил давомида ОФК Фестивали Тошкентда ўтказилган.
