Ўтган йили “Навбаҳор” сафида муваффақиятли тўп тепган Александр Шадрин янги чемпионатга Тошкентнинг “Локомотив” клубида тайёргарлик кўрмоқда. Футболчига баъзи саволлар билан мурожаат қилдик.

— Александр янги мавсумга тайёргарликни “Локомотив”да ўтказаяпсиз. Жамоа билан шартнома тузиб бўлдингизми? Умуман “темирйўлчилар” сафига сизни ким таклиф қилди?
— Тўғрисини айтсам, ҳали “Локомотив” билан шартнома тузганим йўқ. Аммо клуб билан оғзаки келишувим бор. Яқин кунларда расман шартнома тузаман. Клубга эса мени Рустам Абдуллаев таклиф қилдилар.

— Аслида сиз “Машъал” клубига тегишлисиз. Аммо сўнгги йилларда асосан бошқа жамоаларда тўп тепиб келаяпсиз. Бунга сабаб нимада? Муборакликлар билан шартномангиз қачон тугайди?
— Тўғриси нима учун бундай бўлаётганини ўзим ҳам ҳайронман. Балки мураббийнинг ўйин услубига мос тушмаётгандирман. “Машъал” билан ўртадаги шартнома шу йилнинг охирида якунига етади.

— “Локомотив”да ўйнаб қандай натижаларга эришмоқчисиз? Янги мавсумда ўз олдингизга қандай мақсадлар қўймоқдасиз?
— Бу клубга ўтишим олдинга ташланган қадам деб ўйлайман. Клуб сафида тўп тепиб чемпионатда совринли ўринлардан бирини қўлга киритмоқчиман. Асосий мақсадим – мунтазам равишда ўйин амалиётига эга бўлиш ва жамоага ёрдам бериш. Шунингдек, миллий терма жамоа сафидан мустаҳкам жой эгаллаш.

Зафарбек НЕЪМАТОВ суҳбатлашди