Лондоннинг «Челси» клуби яримҳимоячиси Хуан Мануэль Мата «Наполи»га қарши ЕЧЛ нимчорак финал учрашувидан сўнг ўз фикрлари билан ўртоқлашар экан, «Челси» иккинчи ўйинда муваффақият қозона олишига ишонч билдирди. Бу ҳақда «Sky Sports» хабар бермоқда.

Италиянинг «Наполи» ҳамда Англиянинг «Челси» жамоалари ўртасидаги ЕЧЛ 1/8 финал учрашуви неаполликларнинг 3:1 ҳисобидаги иродали ғалабаси билан якунига етди. Дастлаб, 27-дақиқада Хуан Мата ҳисобни очиб, «Челси»ни олдинга олиб чиққан бўлса-да, Лавессининг дубли (39-дақиқа, 65) ва Каванининг битта голи (45) Маццари шогирдларига муҳим ғалабани тортиқ этди.

«Наполи» жуда ҳам кучли жамоа, аммо олдинда иккинчи ўйин ҳам бор. «Стэмфорд Бриж»даги баҳсда биз 100 фоиз куч билан ҳаракат қилишни мақсад қилганмиз», деди испаниялик футболчи.

«Бугун очиқ футбол бўлишини билгандим. Чунки «Наполи» таркибидаги Кавани, Лавесси ва Ҳамшик қарши ҳужумларда жуда ҳам тезкор ҳаракат қилишади», деди Мата.

«Бугун бизда гол уриш учун қатор вазиятлар бўлди. Биз бугунги имкониятларни Лондондаги баҳсда голларга айлантирамиз. Мен жамоамизга ишонаман, биз ҳали тирикмиз. Ҳа, чорак финалга чиқиш қийин бўлади, аммо биз бунинг уддасидан чиқа оламиз», деди «Челси» ярим ҳимоячиси Хуан Мата.

Эслатиб ўтамиз, «Наполи» – «Челси» жуфтлиги жавоб учрашуви 14 март, чоршанба куни Лондонда бўлиб ўтади.