Кеча Конференциялар Лигаси гуруҳ босқичи 1-тур учрашувлари доирасидаги «Рома» – ЦСКА жамоалари ўртасидаги баҳс энг яхши футболчиси аниқланди. Бу ҳақида Рим клуби ўз ижтимоий тармоқлардаги саҳифалари орқали хабар бермоқда.
«Бўрилар» ҳомийси ҳисобланган DigitalBits компанияси томонидан «Рома»нинг ҳар бир учрашуви энг яхши футболчиси аниқланиб келинмоқда. ЦСКАга қарши учрашувда терма жамоамиз аъзоси Элдор Шомуродов «Маn of the Match» деб топилди. Манбада айтилишича, кўплаб римлик мухлислар «Рома»нинг Конференциялар Лигаси 1-тур учрашуви энг яхши футболчиси деб айнан Шомуродовни эътироф этишган.
«Гуруҳдаги биринчи ўйинимизда ғалаба қозониш жуда муҳим эди. Жуда хурсандмиз, лекин энди биз кейинги ўйинга бор эътиборимизни қаратишимиз керак», - дейди Шомуродов махсус совринни қабул қилиб олгандан кейин.
Эслатиб ўтамиз, «Рома» – ЦСКА учрашувида мезбонлар йирик 5:1 ҳисобида ғалаба қозонишган. Шомуродов эса Пеллегрини ва Абрахамнинг голларига асистентлик қилган.
