Янги мавсумга ҳозирликни БААда олиб бораётган «Локомотив» клуби қароргоҳига кеча жамоа машғулотларини кузатиш учун ХХ асрнинг буюк футболчиларидан бири, афсонавий Диего Армандо Марадона «Локомотив» базасига ташриф буюрди. Бу ҳақда клуб расмий сайти хабар тарқатмоқда.
Аргентиналик футбол афсонаси айни пайтда БААнинг «Ал-Васл» клуби бош мураббийи саналади. Ўз даврида анчайин муваффақиятли тўп сурган ҳамда жаҳон юлдузлари сафидан жой олган тошкентликлар бош мураббийи Хорен Оганесян эса Марадона билан таниш чиқиб қолди. Қуйидаги суратда бунга ўзингиз ҳам амин бўласиз.
Марадона жамоа машғулотларини кузатди ҳамда ўз таассуротларини жамоа аъзолари билан ўртоқлашди. Умид қиламизки, футбол қиролининг маслаҳатлари фақат ва фақат жамоа манфаатига хизмат қилади.
