20 карра катта дубулға туркумидаги турнирлар ғолиби швейцариялик Рожер Федерер қачон кортга қайтмоқчи эканлиги ҳақида маълум қилди. Август ойида Федерер тиззасини яна операция қилдиришга қарор қилганлиги ва мавсумнинг қолган қисмини ўтказиб юборишини оммага айтган эди.

"Энди мен олдинга қадам босишим керак. Аввалига, одатдагидек нормал югуришни, сўнгра ёнга ҳаракат қилишни ва тезликни аввалги ҳолига қайтариш устида ишлашим керак. Охир-оқибат мен барибир кортга қайтаман. Лекин менга ҳали яна 2-3 ой керак бўлиши мумкин. Келаси йилги мавсумда балки яна теннис ўйнаб бошларман. Аммо, шошилмаслигим керак, мен ҳаммаси тўғри бўлишини хоҳлайман. Энг ёмони ортда қолди. Яқин орада яна энг юқори формада қайтаман", - деди Федерер.