Янги чемпионатга тайёргарликни Туркиянинг Анталия шаҳрида давом эттириб, 26 февраль куни юртимизга қайтиб келган Ғузорнинг «Шўртан» клуби аъзолари айни пайтда қисқа муддатли таътилга йўл олишди.
«Жамоа 26 февралдан 27 февралга ўтар кечаси юртимизга қайтиб келди. Мураббийлар кенгаши ва футболчилар 3 марта куни пойтахтимиздаги «Ўзбекистон» меҳмонхонасига жойлашишади ва янги чемпионатга тайёргарликнинг сўнгги босқичини Тошкентда давом эттиришади. Пойтахтдаги машғулотлар 10 мартгача давом эттирилади ва жамоа аъзолари 11 март куни Ғузор шаҳрига йўл олишади. Шунингдек, жамоамиз пойтахтдаги сўнгги ўқув-йиғин машғулотлари жараёнида биринчи лига вакили — «Бунёдкор-2» ҳамда Олий лига вакили — Зарафшоннинг «Қизилқум» жамоалари билан ўртоқлик учрашувларини ўтказишни ўз режасига киритган», — дейди клуб матбуот котиби Одилбек Толипов.
Эслатиб ўтамиз, «Шўртан» клуби чемпионатнинг биринчи ва иккинчи турларини ўз майдонида ўтказишади. Биринчи турда Тошкентнинг «Локомотив» клуби Игорь Кришушенко шогирдларига қарши майдонга чиқса, иккинчи турда Наманганнинг «Навбаҳор» клуби Ғузорга сафар уюштиради.
